Aufstand für Anstand

Guy Krneta © Ayse Yavas
Guy Krneta / 29. Sep 2015 - Aaschtändig isch e Flüchtlingspolitik, wo für die da isch, wo üsi Hiuf hüt bruuche.

Red. In Aarau demonstrierten am 22. September 3'500 Frauen und Männer für Solidarität mit den Menschen auf der Flucht. Für diesen Anlass hatte der Berner Autor Guy Krneta folgenden Text verfasst.

---

Aufstand für Anstand

Aaschtändig isch grüessech säge.

Aaschtändig isch d Hang gä.

Aaschtändig isch, öperem dr Name z säge.

Aaschtändig isch, enang i d Ouge z luege.

Aaschtändig isch z frage, wi’s öperem geit.

Aaschtändig isch z frage, öb me guet greist syg.

Aaschtändig isch z frage, öb me scho gässe heig.

Aaschtändig isch z frage, öb me nid wöu ynecho.

Aaschtändig isch z frage, öb me ke Gepäck drby heig.

Aaschtändig isch z frage, öb me nid wöu absitze.

Aaschtändig isch z frage, öb me nid glych chly Hunger heig.

Aaschtändig isch z frage, öb men e Pullover wöu oder e Jagge.

Aaschtändig isch z frage, öb men öper hie kenn.

Aaschtändig isch z frage, öb me Ching heig.

Aaschtändig isch z frage, öb men öpis heig zum Schlafe.

Aaschtändig isch z frage, wi’s de Ching göng.

Aaschtändig isch z frage, öb men überhoupt vrschtöng, was me da aus gfragt wärd.

Aaschtändig isch z säge, im schlimmschte Fau hätt me de non e Techi.

Aaschtändig isch z säge, im schlimmschte Fau hätt me de non e Matratze.

Aaschtändig isch z säge, im schlimmschte Fau hätt me de non e Schlafsack, wo men im schlimmschte Fau o chönnt mitgä.

Aaschtändig isch z säge, im schlimmschte Fau chönnt men eim o aalüte.

Aaschtändig isch z säge, es syg schön, dass me sech überhoupt lehr kenne. Das syg hüt ja nümm säubvrschtändlech.

Aaschtändig isch z säge, d Eutere vo eim syge nämlech o nid vo hie.

Aaschtändig isch z säge, d Groseutere vo eim syge nämlech o nid vo hie.

Aaschtändig isch z säge, d Urgroseutere syge synerzyt usgwanderet.

Aaschtändig isch z säge, me chönn eigentlech nüt drfür, wo dass men uf d Wäut cho syg.

Aaschtändig isch z säge, me häuf gärn, we me chönn.

Aaschtändig isch z säge, me chönn nume bedingt häufe, we d Politik nid mitmach.

Aaschtändig isch z säge, d Politik chönn nume bedingt mitmache, we d Schtimmbevöukerig nid mitmach.

Aaschtändig isch z säge, dass men e Teil syg vo dere Schtimmbevöukerig, wo’s ir Hang heig, wi aaschtändig hie mit öperem umgange wärd.

Aaschtändig isch z vrlange, dass hie aaschtändig mit Mönschen umgange wird.

Aaschtändig isch z vrlange, dass me Lüt pärsönlech darf häufe.

Aaschtändig isch z vrlange, dass Lüt hie d Müglechkeit überchöme sich säuber z häufe.

Aaschtändig isch z vrlange, dass Lüt vo Hiufswärch betröit wärden u nid vo profitorientierte Service- u Wachgseuschafte.

Aaschtändig isch z vrlange, dass nid ds Gäut i di profitorientierte Service- u Wachgseuschafte fliesst, sondern de Flüchtlinge hiuft, sich säuber z häufe.

Aaschtändig isch z vrlange, dass es legali Fluchtroute git hie häre.

Aaschtändig isch z vrlange, dass niemer meh zrügg gschafft wird uf Ungarn.

Aaschtändig isch z vrlange, dass niemer meh zrügg gschafft wird uf Italie.

Aaschtändig isch z vrlange, dass niemer meh zrügg gschafft wird uf Griecheland.

Aaschtändig isch z vrlange, dass aui freigla wärde, wo i üsne Usschaffisgfängnis hocke, wüu si söue zrügggschafft wärden uf Ungarn, Italien u Griecheland.

Aaschtändig isch z vrlange, dass dä jung Maa us Afghanischtan, wo i däm Momänt z Basu im Usschaffigsgfängnis sitzt, wüu’r am 29. Septämber söu uf Ungarn usgschafft wärde, sofort freigla wird.

Aaschtändig isch e Flüchtlingspolitik, wo für die da isch, wo üsi Hiuf hüt bruuche.

Aaschtändig isch es, Mönscherächt u Demokratie u Glychberächtigung nid mit dr Armee z vrteidige, sondern mit offnige Türen u Aaschtang.

62 Organisationen aus dem Kanton Aarau, darunter die drei Landeskirchen, hatten zur Demonstration gegen Fremdenfeindlichkeit eingeladen. (Bild Anne Burgmer, Horizonte)

---

Themenbezogene Interessen (-bindung) der Autorin/des Autors

Keine

Weiterführende Informationen

Demo Aarau Flüchtlinge

Meinungen / Ihre Meinung eingeben

Ähnliche Artikel dank Ihrer Spende

Möchten Sie weitere solche Beiträge lesen? Ihre Spende macht es möglich:

Mit Kreditkarte oder Paypal - oder direkt aufs Spendenkonto für Stiftung SSUI, Jurablickstr. 69, 3095 Spiegel BE
IBAN CH0309000000604575581 (SSUI)
BIC/SWIFT POFICHBEXXX, Clearing: 09000

Ihre Spenden können Sie bei den Steuern abziehen.

Einzahlungsschein anfordern: kontakt@infosperber.ch (Postadresse angeben!)

Noch keine Meinungen

Ihre Meinung

Loggen Sie sich ein, um Ihre Meinung unter Ihrem richtigen Namen zu äussern. Wir gestatten keine Meinungseinträge anonymer User, um Missbräuche zu vermeiden. Hier können Sie sich registrieren.
Sollten Sie ihr Passwort vergessen haben, können Sie es neu anfordern. Achtung: Die Länge der Einträge ist beschränkt und wir erlauben nicht, zwei Meinungseinträge unmittelbar hintereinander zu platzieren. Unnötig herabsetzende Formulierungen ändern oder löschen wir ohne Korrespondenz.